کراچی: صوبائی وزیر اطلاعات سندھ شرجیل انعام میمن نے کہا کہ دو روز قبل حیدرآباد میں پیش آنے والا واقعہ افسوس ناک ہے ۔ سندھ میں کسی کو قانون ہاتھ میں لینے کی اجازت نہیں دینگے ۔ اے این پی رہنما شاہی سید اور قومی عوامی تحریک سربراہ ایاز لطیف پلیجو سے رابطہ کر کے سندھ میں امن اور بھائی چارے کے قیام میں مثبت کردار ادا کرنے کی درخواست کی۔ دونوں رہنماؤں نے سندھ میں امن و بھائی چارے کی فضا کو قائم رکھنے کے لیے اپنے بھرپور کوششوں کی یقین دہانی کرائی ۔ شرجیل انعام میمن نے کہا کہ افسوس ناک واقعات میں چند ملزمان کو گرفتار کیا گیا ہے کوئی بھی شر پسند قانون ہاتھ میں لے گا تو ان کے خلاف سخت کارروائی کی جائے گی ۔ انہوں نے کہا کہ حیدرآباد واقعہ میں قتل ہونے والے نوجوان کے ایک قاتل کو گرفتار کیا گیا ہے ۔ واقعہ کے بعد کاروباری املاک کو نقصان پہنچانے والے نوجوانوں کو بھی گرفتار کیا گیا ہے ۔ شرجیل انعام میمن نے کہا کہ سندھ صوفیاء کرام اور امن پسندوں کی دھرتی ہے ۔ سندھ کے پر امن ماحول کو ہر صورت میں برقرار رکھا جائے گا ۔
Menu