مسلم لیگ لائیرز ونگ کے 30 وکلا کی پیپلز پارٹی میں شمولیت

کراچی : وزیر اطلاعات و محنت سندھ و صدر پیپلز پارٹی کراچی ڈویژن سعید غنی نے کہا ہے کہ پیپلزپارٹی پر جس طریقے سے تمام شعبہ ہائے زندگی سے تعلق رکھنے والے افراد اعتماد کا اظہار کرتے ہوئے پارٹی کا حصہ بن رہے ہیں یہ ان کا چیئرمین بلاول بھٹو زرداری پر اعتماد کا اظہار ہے۔آج وکلاء برادری نے جس اعتماد کا اظہار کرتے ہوئے پیپلزپارٹی میں شمولیت کا اعلان کیا ہے وہ قابل ستائش ہے اور انشا اللہ آنے والے بار کے انتخابات ہوں، بلدیاتی یا قومی و صوبائی اسمبلیوں کے پیپلزپارٹی سب سے بڑی جماعت میں سامنے آئے گی۔ ان خیالات کا اظہار انہوں نے جمعرات کے روز اپنے دفتر میں مسلم لیگ نون لائیرز فورم کے صوبائی اور کراچی ڈویژن کے عہدیداروں سے ملاقات اور ان کی پیپلز پارٹی میں شمولیت کے اعلان کے موقع پر خطاب کرتے ہوئے کیا۔ اس موقع پر ایڈوکیٹ کے کے جاوید خان کی قیادت میں آنے والے 30 سے زائد مسلم لیگ لائیرز ونگ کے وکلاء رہنماؤں نے پیپلزپارٹی میں شمولیت کا اعلان کیا۔اس موقع پر پیپلزپارٹی سندھ کے جنرل سیکرٹری و معاون خصوصی وزیر اعلٰی سندھ وقار مہدی، پیپلز لائیرز فورم سندھ کے جنرل سیکرٹری ارشد نقوی، کراچی لائیرز فورم کے صدر ایڈووکیٹ قاضی بشیر، و دیگر بھی ان کے ہمراہ موجود تھے۔شمولیت کرنے والوں میں مسلم لیگ نون لائیرز فورم سندھ کے ایڈیشنل جنرل سیکرٹری عبدالصادق تنولی، ایس ایم خالد اظہر، مسلم لیگ نون لیڈر ونگ لائیرز فورم کراچی کی جوائنٹ سیکرٹری حسن بانو اور دیگر شامل تھے۔اپنے خطاب میں صوبائی وزیر سعید غنی نے کہا کہ ہمارے لئے یہ خوشی کی بات ہے کہ آج ایک انتہائی پڑھی لکھی اور عوام کا دکھ درد سمجھنے والی وکلاء برادری کی بڑی تعداد پیپلزپارٹی میں شامل ہوئی ہے۔ سعید غنی نے پیپلزپارٹی پر جس طریقے سے تمام شعبہ ہائے زندگی سے تعلق رکھنے والے افراد اعتماد کا اظہار کرتے ہوئے پارٹی کا حصہ بن رہے ہیں یہ ان کا چیئرمین بلاول بھٹو زرداری پر اعتماد کا اظہار ہے۔ انہوں نے کہا کہ میں آپ تمام کو نہ صرف پیپلزپارٹی میں شمولیت پر خوش آمدید کہتا ہوں بلکہ امید دلاتا ہوں کہ آپ کا فیصلہ آپ کے لئے درست ثابت ہوگا۔ اس موقع پر صوبائی جنرل سیکرٹری وقار مہدی  نے کہا کہ آج وکلاء برادری نے جس اعتماد کا اظہار کرتے ہوئے پیپلزپارٹی میں شمولیت کا اعلان کیا ہے وہ قابل ستائش ہے اور انشااللہ آنے والے بار کے انتخابات ہوں، بلدیاتی یا قومی و صوبائی اسمبلیوں کے پیپلزپارٹی سب سے بڑی جماعت میں سامنے آئے گی۔ وقار مہدی  نے کہا کہ ہم نے پارٹی کی نیچے تک کی سطح کو مکمل اختیارات دئیے ہوئے ہیں کیونکہ ہماری عوامی پارٹی ہے اور ہم غریبوں، محنت کشوں اور ہر سطح کے لوگوں کی پارٹی ہیں۔ تقریب سے خطاب کرتے ہوئے ارشد نقوی نے کہا کہ میں اپنی وکلاء برادری کو اپنی اور پارٹی کی اعلی قیادت کی جانب سے خوش آمدید کہتا ہوں۔