مسلم لیگ (ن) کا کراچی میں سیمینار

کراچی :مسلم لیگ نون کے تحت 12اکتوبر1999 کوجمہوری حکومت کا تختہ الٹنے کے خلاف یوم سیاہ کی مناسبت سے کراچی میں سیمینار کا انعقاد کیا گیا،مقررین کا کہنا تھا کہ 12اکتوبر1999کے دن پرویزمشرف نے نون لیگ حکومت کاتختہ الٹ کرمارشل لاء نافذ کیا تھا۔سندھ مسلم لیگ ہاوئس، کارساز میں منعقد ہونے والے سیمینار میں لیگی رہنما نہال ہاشمی، خواجہ طارق و دیگر رہنماوں سمیت کارکنان کی بڑی تعداد شریک ہوئی۔مسلم لیگ ن کے رہنما نہال ہاشمی نے کہاکہ ڈاکٹر عبد القدیر خان کے خلاف فواد چوہدری اپنا ٹوئیٹ ڈیلیٹ کریں،محسن پاکستان ڈاکٹر عبدالقدیر خان کیخلاف کوئی بات کی تو ہم کسی صورت برداشت نہیں کرینگے ۔ انہوں نے کہاکہ بارہ اکتوبر کے بعد ملک میں دہشتگردی شروع ہوئی12اکتوبر کے واقعہ کا کچھ ججوں نے آئینی جواز پیش کیا ، جس کے بعد عدلیہ کا زوال شروع ہوا،بارہ اکتوبر نوازشریف کی ہمت کو سلام پیش کرنے کا دن ہے۔ لیگی رہنما ایم این اے خیل داس نے کہاکہ نون لیگ کے کارکنان آج بھی نوازشریف کے ساتھ کھڑے ہیں
نوازشریف آج بھی "نو”کہنے کی ہمت رکھتے ہیں ،کٹھ پتلی عمراں خان کبھی نوازشریف کی طرح نہیں بن سکتا،نواز شریف سے استعفی لینے کیلئے دباو ڈالا گیا ،پی ڈی ایم کی جدوجہد جاری ہے ،جلد عوام کی حکمرانی آئے گی،سلیکٹڈ حکومت اور کٹھ پتلی وزیراعظم نے جمہوریت کو تباہ کردیا،عمران خان میں نوازشریف کی طرح "نو”کہنے کی ہمت نہیں ہے۔ مقررین کا کہنا تھا کہ بارہ اکتوبر پاکستانی تاریخ کا وہ سیاہ ترین دن جب فوجی آمر نے منتخب حکومت کا تختہ الٹ کر جمہوریت کی بساط لپیٹ دی۔ 12 اکتوبر1999 کو مستحکم جمہوری نظام کو پٹڑی سے اتارناپاکستان کو ترقی کے راستے سے ہٹانے کی گھناؤنی سازش تھی ،غیر جمہوری اقدام کے نتائج پاکستانی قوم آج بھی بھگت رہی ہے،مسلم لیگ (ن) جمہوریت اور جمہوری اداروں کے استحکام کیلئے سرگرم عمل ہے نوازشریف کی حکومت پرویز مشرف کے غاصبانہ قبضے کی نذر نہ ہوتی تو آج پاکستان کا شمار دنیا کے ترقی یافتہ ممالک میں ہوتا ملکی مسائل کا حل کرپشن ، اقربا پروری اور لوٹ مار سے پاک جمہوریت کے تسلسل اور استحکام میں مضمر ہے۔