مہنگائی کے خلاف احتجاج پر زرداری کی جیالوں کو شاباش

کراچی :سابق صدر آصف علی زرداری نے مہنگائی اور بیروزگاری کے خلاف ملک گیر احتجاج پر جیالوں کو شاباش دی ہے اورکہاہے کہ پیپلزپارٹی جنگ سے تباہ حال ملک کی دوبارہ تعمیر کر سکتی ہے تو مہنگائی پر بھی قابو پا سکتی ہے ،آصف زرداری کا کہنا ہے کہ ہمارے دور میں دو خطرناک سیلاب آئے مگر نہ انسانی خوراک میں کمی ہوئی نہ مہنگائی ہوئی،ہم غریبوں کے ہیں اور غریب ہمارے ہیں اس لیئے غریبوں کی مشکلات ختم کرتے ہیں،اب ملک کا ہر شہری مہنگائی اور بیروزگاری کا شکار ہے ،ہم کسی سے انتقام لینے میں وقت ضائع نہیں کرتے ہماری ترجیح عوام کی خدمت ہوتی ہے ۔آصف زرداری نے کہاکہ ہم پھر آئیں گے ، برطرف ملازمین کو بحال کریں گے اور روزگار کے وسائل پیدا کریں گے۔ انہوں نے کہاکہ بلاول بھٹو زرداری میدان میں آ چکے ہیں فتح عوام کی ہوگی پیپلزپارٹی مہنگائی بھی ختم کرے گی اور عوام میں خوشحالی بھی لائے گی ۔