نوازلیگ لتر کھاکر سمجھوتہ ایکسپریس پر چڑھے گی : شیخ رشید

کراچی:وفاقی وزیرِ داخلہ شیخ رشید احمد نے کہاہے کہ عالمی منظر نامہ تبدیل ہونے جا رہا ہے، پاکستان اس میں تاریخی کردار ادا کرے گا،جو ہتھیار پھینک دے اس سے لڑنا جائز نہیں ہے، جنہوں نے اے پی ایس کے بچوں کو شہید کیا ان کا کیس الگ ہے،امریکا اور چین سے اچھے تعلقات چاہتے ہیں، ان شا اللہ مہنگائی پر قابو پا لیں گے،اسی ہفتے چیئرمین نیب کا فیصلہ بھی ہو جائے گا، پیپلز پارٹی سمجھدار ہے سمجھوتہ ایکسپریس پر چڑھ گئی ہے، ن لیگ لتر بھی کھائے گی اور سمجھوتہ ایکسپریس پر بھی چڑھے گی، ایف آئی اے کو ہدایت کی ہے کہ ڈالر ہولڈنگ پر کریک ڈاﺅن کریں، مستقبل کی سیاست گہرے پانیوں کی ہے۔ جناح انٹرنیشنل ایئرپورٹ پرمیڈیا سے گفتگو کرتے ہوئے انہوں نے کہا کہ امریکا و چین سب سے بہتر تعلقات چاہتے ہیں، افغانستان میں ہر قسم کے انسانی بحران میں ان کی مدد کریں گے، دنیا کے ساتھ بھی کھڑے ہیں اور افغانستان کے حالات کے ساتھ بھی کھڑے ہیں۔۔ ہم ایسی پوزیشن پر بیٹھے ہوئے ہیں کہ دنیا ہم سے بات کر رہی ہے،دنیا کی کوئی سپر پاور ہمیں بائی پاس نہیں کرسکتی، پاکستان چاہتا ہے افغانستان میں جامع حکومت ہو، افغان صورت حال پر پاکستان اور امریکی وزرائے خارجہ رابطے میں ہیں۔ امریکی صدر جو بائیڈن کے حوالے سے شیخ رشید نے کہا کہ کوئی ہمارے ملک آئے تو بسم اللہ، نہ آئے تو اسلام علیکم، افغان صورت حال پر امریکی صدر کو نشانہ بنانا ناانصافی ہے، امریکی عوام افغانستان کی صورتحال سے بے خبر ہیں، بائیڈن خود اپنے لوگوں کو جواب دے۔وزیرِ داخلہ نے کہا کہ جو آ رہا ہے دل کشادہ ہے، جو نہ آئے خدا حافظ، واپسی کے دستخط امریکا نے کیئے ہیں ہم نے تو نہیں کیئے، ہم افغان بحران میں ہر ممکن مدد کریں گے۔ امریکی صدربائیڈن کے فون سے متعلق جس وزیر نے بیان دیا یہ کوئی اچھی بات نہیں ہے۔ ہمارے پڑوس میں 42 ممالک کی فوج اور ایجنسیاں لگی ہوئی تھیں، انہیں حالات کا پتہ ہی نہیں چلا۔کالعدم تحریک طالبان پاکستان سے مذاکرات کے حوالے سے وفاقی وزیرداخلہ نے کہا کہ طالبان سے بات چیت کی ابتدا ہو رہی ہے، بات چیت کسی نتیجے پر نہیں پہنچی، ابھی تو آغاز ہے۔ ہمیں معلوم ہے کہ کون اچھا ہے اور کون برا ہے، ہماری منصوبہ بندی دو چار سال کی نہیں 20 سال کی ہے۔ اے پی ایس کے بچوں کو قتل کرنے والوں کا کیس الگ ہے۔ جنہوں نے ہتھیار ڈال دئیے ہیں ان سے لڑائی نہیں کریں گے۔انہوں نے کہاکہ میں ایک سیٹ کا وزیر ہوں، عمران خان میری بات سنتے ہیں، وزیرِ اعظم کو سب سے زیادہ مہنگائی کی فکر ہے، جو ڈیل ہو رہی ہے اس پر فارن آفس بیان دے رہا ہے۔انہوں نے کہا کہ اگلے الیکشن کے لیے بھی کوشش کی جا رہی ہے۔شیخ رشید نے کہا کہ لوگوں نے اگلا الیکشن عمران خان کی قیادت میں لڑنا ہے، باقی تو میری طرح تھکے ہوئے لوگ ہیں۔