کراچی :پاکستان پیپلز پارٹی سندھ نے مہنگائی کے خلاف 29 اکتوبر کو سندھ بھر میں احتجاج کا اعلان کردیا۔پارٹی کے صوبائی صدر نثار احمد کھوڑو کا کہنا ہے کہ مہنگائی کے خلاف 29 اکتوبر کو نماز جمہ بعد سندھ کے تمام اضلاع میں احتجاج کیا جائے گا۔ ہر ضلع کے احتجاج میں پارٹی کے ہزاروں کارکنان ، پارٹی عہدیداروں سمیت ایم این ایز، ایم پی ایز، سینیٹرز شرکت کرینگے۔ نثار کھوڑونے کہا کہ بہت جلدتبدیلی کا جنازہ نکلنے والا ہے اور اس یزیدی وفاقی حکومت سے جلد نجات حاصل کرینگے۔ انہوں نے کہا کہ پی ڈی ایم اگر پیپلز پارٹی کی تجویز پر عمل کرے تو پہلے مرحلے میں پنجاب اور دوسرے مرحلے میں وفاق میں عمران خان کی حکومت کو گھر بھیج سکتے ہیں۔انہوں نے کہا کہ پی ڈی ایم اس حکومت سے جان چھڑانے میں سنجیدہ ہے تو ن لیگ اب پنجاب میں عثمان بزدار کے خلاف تحریک عدم اعتماد پیش کرے۔بلوچستان کے بعد پنجاب میں عثمان بزدار کو عدم اعتماد کی تحریک کے ذریعے ھٹانے کے لئے راستہ ہموار ہوچکا ہے۔۔نثار کھوڑو نے کہا کہ نواز لیگ اگر پنجاب اسمبلی میں عثمان بزدار کے خلاف تحریک عدم اعتماد پیش کرے تو پنجاب کے بعد وفاق میں اپوزیشن کی قوت سے عمران خان کو عدم اعتماد کی تحریک کے ذریعے گھر بھیجا جا سکتا ہے۔۔انہوں نے کہا کہ مہنگائی کے خلاف احتجاج نتیجہ خیز ثابت ہوگا اور ملک کے کونے کونے سے موجودہ حکومت کے خلاف عوام سراپا احتجاج ہیں۔انہوں نے کہاکہ عوام نے جس طرح ماضی میں ایوب خان اور اس کی مھنگائی کے خلاف تحریک چلائی اب اسی طرح عمران خان کی حکومت اور مہنگائی کے خلاف تحریک کے لئے باہر نکل چکے ہیں۔ آئندہ انتخابات کے بعد ملک میں پیپلز پارٹی کی جمہوری حکومت ہوگی۔ وفاقی حکومت کے رویہ نے پارلیمنٹ کے ماحول کو بھی خراب کردیا ہے جس وجہ سے پارلیمنٹ میں عوام کی بہتری کے لئے کوئی قانون سازی نہیں کی جا رہی۔ نثار کھوڑو نے مشورہ دیا کہ عمران خان استعفیٰ دیں اور عوام کو بہتر فیصلہ کرنے کا موقع دیا جائے۔
Menu