پی ٹی آئی عدالتوں پر اثر انداز ہورہی ہے : شرجیل انعام میمن

کراچی: صوبائی وزیر اطلاعات شرجیل انعام میمن نے کہا ہے کہ پی ٹی آئی نے ملک کی عدالتوں پر اثر انداز ہونے کی ہر ممکن کوشش کی ہے۔سپریم کورٹ لاہور رجسٹری پر حملہ ملک کی عدلیہ پر حملہ تصور کرتے ہیں ۔ اپنے ایک بیان میں انہوں کا کہنا ہےکہ عمران خان ملک میں بدمعاشی اور غنڈہ گردی کر کے اداروں پر اثر انداز ہو رہے ہیں ۔ پچھلے 5 سالوں سے عمران خان اپنی مرضی کے فیصلے لیتے رہے ہیں ۔ افسوس کی بات ہے کہ عمران خان کو جھوٹا صادق و امین کا سرٹیفیکیٹ ملا ہوا ہے ۔ صوبائی وزیر نے کہا کہ کے پی کے بی آر ٹی پر بھی اسٹے آرڈر ملا ہوا ہے ۔ عمران خان کو بنی گالا کی غیر قانونی تعمیرات پر بھی اجازت دی گئی ۔ ملک سے اب لاڈلہ ازم کا خاتمہ ہونا چاہیے ۔ قانون سب کے لیے یکساں ہونا چاہیے ۔ ان کا کہنا ہے کہ اگر یہی روایت رہی کہ جس کی لاٹھی اس کی بھینس تو کیا میسیج نہیں دیا جا رہا کہ ہر کوئی لاٹھی اٹھا لے۔ انصاف کے تقاضے سب کے لیے یکساں ہونے چاہیے ۔ پاکستان میں عمران خان کے لیے الگ قانون ہے اور باقی لوگوں کے لیے الگ قانون ہے ۔ عمران خان خود کو قانون سے بالاتر سمجھتے ہیں ۔ عمران خان اور پی ٹی آئی کو 100 خون معاف ہیں ۔ شرجیل انعام میمن نے کہا کہ پاکستان پیپلز پارٹی اور اس کے اتحادی ملک سے لاڈلہ ازم کے خاتمہ اور قانون کی بالادستی کے لئے جدوجہد کر رہے ہیں ۔